"الكلام على إيه" مع همت سلامة يتناول فى أولى حلقاته سرقة فيلا نوال الدجوى

ينطلق برنامج جديد بعنوان "الكلام على إيه" على تليفزيون اليوم السابع، من تقديم الكاتبة الصحفية همت سلامة رئيس التحرير التنفيذى لـ"اليوم السابع".

ويتناول البرنامج تفنيد وتحليل أبرز القضايا المثارة على الساحة والتي تشغل الرأي العام، ويسلط البرنامج في أولى حلقاته الضوء على أشهر قضية شغلت الشارع المصري خلال الفترة الماضية وهي واقعة سرقة فيلا الدكتورة نوال الدجوي رئيس مجلس أمناء جامعة أكتوبر للعلوم الحديثة والآداب (MSA)، لكن التناول هنا يأتى بمنظور مختلف عن تريندات السوشيال ميديا وحملات التشويه التى طالت مربية عظيمة تخرجت من تحت يدها أجيال كثيرة.

وتقول الكاتبة الصحفية همت سلامة فى مقدمة برنامجها، "الكلام على إيه؟.. الكلام النهاردة وبكرة وبعده على أشهر قضية تشغل الشارع المصري دلوقتي وبيتكلم فيها الصغير قبل الكبير"، مضيفة: "الكلام على سرقة خزينة الدكتورة نوال الدجوي، والكلام المرة دي مش ببلاش، لاء ده بفلوس كتيرة أوي، تقريبا بأكثر من ربع مليار جنيه، بس برضو الكلام مش على فلوس وبس، ده كلام على صراع أحفاد وميراث، وللأسف وصل للمحاكم".

وأضافت: "أنا هنا مش هتكلم عن القضية لأن لسه في تحقيقات شغاله محدش عارف عنها حاجة، ومن وقت السوشيال ميديا ما عرفت بالواقعة والناس كلها والصحافة كمان بدأت تتكلم عن أحفاد الدكتورة نوال الدجوي اللي تقدموا بدعوي حجر عليها، هنا بقى لازم نقف عند سؤال مهم جدًا.. هو حضرتك تعرف دكتورة نوال الدجوي كويس؟ تعرف أي حاجة عن حياتها؟ عن شخصيتها؟ تعالي بقى أقولك".

وتابعت في حديثها عن الدكتورة نوال الدجوي: "هي سيدة عظيمة بكل ما تحمله الكلمة من معنى بدون مبالغة، هل حضرتك تعرف إنها أقدم مربية تخرج من تحت أيدها أجيال وأجيال؟ طب دلوقتي الكلام على ايه؟.. قبل ما حضرتك أو حضرتك تصدروا أي أحكام على دكتور نوال الدجوي، لازم تعرف إنها لا تستحق أبدًا كل اللي بيحصل فيها دلوقتي، ولا تستحق إنها تشوف اللي بيحصل ده في نهاية حياتها ربنا يديها العمر كله"، مضيفة: "دكتور نوال الدجوي هي اللي عملت وأسست وتعبت وبنت وكبرت وحفرت اسمها في الصخر، وكل اللي بيتخانقوا دلوقتي على ورث وفلوس وذهب ودولارات عايشين أصلا من خيرها، وبالتالي الكلام هنا على إنه ما ينفعش أبدًا صراع الأحفاد على الميراث يكون سبب في تشويه صورة مربية فاضلة وسيدة عظيمة زي نوال الدجوي".

 

واستكملت حديثها عن الدكتورة نوال الدجوي: "الست اللي طول عمرها أيدها في العمل الخيري قبل ما مؤسساتها بتكون بتفكر في الجانب الربح من الأساس، وكلامي في النهاية للسوشيال ميديا اللي كانت مصدر أساسي لكل الهري اللي احنا شوفناه في الموضوع ده من غير حتى ما تخلص التحقيقات"، وتابعت: "نوال الدجوي مش ترند على السوشيال ميديا الناس تقعد تتكلم فيه يومين بتشويه وبسوء سمعة وتنسى بعد كده اللي حصل، اسم نوال الدجوي لازم لما يتقال يتقال في سياق الدور العظيم والبصمة اللي قامت بيها ولسه بتقوم بيها في التعليم الخاص، وإن الكلام عليها ما يكونش كلام على صراع أحفاد ومحاكم وفلوس وذهب ودولارات".

واختتمت همت سلامة بقولها، "دكتور نوال الدجوي سيدة عظيمة تستحق مننا لما نتكلم عنها، نتكلم عنها بكل الخير، لأن الخير ده لا أنا ولا أنت نعرف عنه أي حاجة.. دكتورة نوال الدجوي ربت أجيال كثير جدا، وساهمت في بناء تعليم خاص في مصر ما كانش موجود قبل كده، فلا تستحق أبدًا أن سيرتها تكون على السوشيال ميديا بالشكل ده".