"آلاء" تعيد موضة أزياء الأربعينات.. تستوحى تصميماتها من أفلام الأبيض والأسود

فستان تصميم آلاء

كتبت- نورا طارق

الجمعة، 30 مايو 2025 06:00 م

انجذبت آلاء منذ طفولتها لموضة الستينات والخمسينات، فكانت تجلس تشاهد أفلام الأبيض والأسود وهى منجذبة لتفاصيل فساتين البطلات، ومع مرور الوقت وعندما أصبحت شابة واستطاعت أن تتطور موهبتها في تصميم الملابس فكرت في أن تعيد موضة فساتين الخمسينات والأربعينات للألفينات مرة أخرى.

تحدثت آلاء رضوان ، خريجة كلية آداب قسم أثار إسلامية، لـ " اليوم السابع"، عن إتجاهها لتصميم فساتين موضة الأربعينات والخمسينات، حيث قالت :"تصميم الملابس هوايتى من صغرى، كنت باخد فساتين العرايس وأقلدها على قماش وأعمل بيها فساتين جديدة وتقريباً ورثت الهواية دي من والدتي، وأغلب الوقت كان التليفزيون عندنا شغال على أفلام الأبيض والأسود، وكانت أول حاجة بتلفت نظري فساتينهم وطريقة كلامهم، كنت بتمنى تكون الأفلام ملونة وأشوف الفساتين بالألوان، لأنى كنت مغرمة بقصات الفساتين بتاعتهم وقد إيه كانت بتزودهم أنوثة ورقة".

تابعت :"بدأت أصمم لنفسي فساتين وألبسها، وبعد كده فكرت أعمل مشروع تصميم فساتين موضتها قديمة لأنى كنت عايزة كل الناس تلبس كده، وساعدني على الإنتشار في المجال ده إني بدأت ألاقي حاجات جاهزة بنفس الاستايلات لكن أغلبها شغل أوروبي، وبدأت أشتغل فى الاستوكات والسكند هاند وعشان كمان سعر الفساتين يكون مناسب لكل البنات، وبصوره بشكل كلاسيكي عشان يظهر جماله ".

وعن زبائن آلاء ولمساتها التي تضيفها على تصميماتها، قالت :" بحرص فى تصميم الفساتين إنها تكون من قماش ناعم وقطني عشان البنت وهي لابسة الفستان تكون مرتاحة وده يزود ثقتها في نفسها أكتر وبحب أضيف الدانتيل والچبير لأنى بحس إنه بيزود القطعة أنوثة ورقة، و ده بيعجب زباينى اللى أعمارهم من تحت العشرين ولحد فوق الـ 50 سنة".

وتحدثت آلاء عن أمنيتها التي تحلم بتحقيقها في المستقبل، حيث قالت :" نفسي في المستقبل أقدر أصمم كميات كتير بنفسي و أعمل تغيير كبير في الموضة، وماتبقاش تصميماتى كلها قديمة لكن تبقى ميكس بين الحداثة الهادية والقديم الراقي والشيك، وأشجع كل البنات تبدأ ترجع تلبس فساتين تاني".