القيامة.. قصيدة ريم أحمد المنجي في ملتقى بيت الشعر العربى للنص الجديد

يستعد بيت الشعر العربى، بإدارة الشاعر سامح محجوب، على مدار يومى 17 و18 مايو لتقديم (ملتقى بيت الشعر العربى الأول.. للنص الجديد)، ويدعو فيه 50 شاعرًا، تحت سن الأربعين من جميع ربوع مصر، وذلك للمشاركة فى الملتقى، وسيقوم "اليوم السابع" بنشر قصائد الشعراء تباعًا

بيت الشعر العربي

قصيدة القيامة لـ ريم أحمد المنجي

بكى ..
وابتدت القيامة
انشقت التفاصيل من صخورها
المشاعر من قبورها
نفض الشجر حوالين عينيا أوراق الحقيقة
وجري مفزوع ..
فيه ناس كتيرة
من ذاكرتي اتسحبوا ونطوا
من ايديا اتبعتروا وهاجوا
افواجًا  ..
سكارى ..
ومفيش ملاذ دلوقت
لا شفاعة ولا مرد 
مفيش صلوات
بكى ..
واستويت انا والمعاصي على الصراط

كنا في نعيم الجهل رمانتين ومرمر
أجهلني ..
وافضل جوا روحك طير
اعرفني
ننهار بالتساوي
أضغط على دمعك
تجف
ينكسر جلدك عليا
تدمي احلامك قصادي
نتحرق ..
وده أهون عقاب للمعرفة

من مساحات التخاطر ..
للحقيقة ..
م المفاجأة .. للوصول ..
بعترنا لحظات التجلي
وطلقنا م الأنات خيول
والجهل .. غايه
بس انا وانت
عشنا بنتمنى الوصول

كان الجحيم جواه ..
سكون
وانا والخطايا الفوضوية
بنجر من عينه الكلام
مستهونين بالنار ..
جازفت ..
عتقت له دموعه الحيارى
لملمت ثورات الكلام
في أزايز الويسكي النبيلة
والتنهيدات .. فوارة
اندمجنا ..
صبينا أحزاننا وضحكنا علينا .. مننا
_ترقص ؟
_ارقص لحد ما أهد أوصالي
مين مد ايده قبل مين معرفش  !
لكننا جوا المتاع الحر
حلقنا أبعد من حدود اللوحة
لما انفرد جسمه على جدار الهوا ..
غنى
لما انفرط حزنه على كفى
مقدرش يستنى
حضن الحقيقة وقالي

_ترقصي ؟
_ أجنح ..
أنتشي بالريح
أثور
من غير مايختل اتزان
ولا تندلع براكين
تهدهدنا الطبيعة الأم
وننام ..
متلحفين بالحلم
من غير إرادة لنفسنا اللوامة
لكنه فجأة في دفا الأحداث،
بكى
وابتدت القيامة

ريم المنجي

ريم أحمد المنجي

شاعرة مصرية متميزة، فازت بعدد من الجوائز من بينها جائزة أحمد فؤاد نجم عن ديوانها "فض ذات" كما حصلت على الجائزة نفسها في موسم تابع عن ديوانها "روائح زين" كما فازت بجائزة الدولة التشجيعية.