لكل عريس وعروسة.. 10 نصائح من سماح عبد الفتاح تجعل حياتكم الزوجية سعيدة

وجهت الدكتورة سماح عبد الفتاح، الاستشارية الأسرية، رسالة دعم واطمئنان لكل عروس فى أول يوم لها فى عش الزوجية، مؤكدة أن الليلة الأولى يجب أن تكون بداية للأمان والحب، لا مصدرًا للخوف أو الضغط، مشددة على أن دور الزوج فى هذه الليلة أساسى فى احتواء زوجته وطمأنتها، ومطالبًا إياه بالرفق والحكمة والتفاهم.

وقالت الاستشارية الأسرية، خلال برنامج "الرحلة"، المذاع على قناة الناس، اليوم الخميس: "رسالتى النهارده لكل عروسة جميلة... فى أول يوم، فى أول أسبوع، فى أول لحظة من حياتها الزوجية، عايزة أقولك بكل حب: اطمنى،  والرسالة مش ليكى لوحدك، دى ليكى ولشريكك، لأن هو خلاص بقى الأمان بتاعك، بقى الراجل اللى ربنا جعله حلالك وحاميك من الليلة دى وطول العمر".

وأضافت: "واحدة من أجمل العبارات اللى قريتها عن الليلة دي: ما لا يُؤخذ بالذوق لا يعظم له الشوق، يعنى ببساطة، الهدوء واللين هم اللى بيبنوا العلاقة دى صح، والبداية دى مش زى أى بداية، دى لحظة فارقة، واللى فيها مشاعر كتير، مزيج من حب وثقة وأمان، بس فى المقابل كمان فيه رهبة وقلق، وده طبيعي".

وتابعت: "كل أب وأم ربوا بناتهم على الحفاظ والخصوصية، وفجأة المجتمع بيطلب من البنت دى إنها تنقلب فى لحظة وتكون جاهزة لحياة تانية، من غير تمهيد حقيقى، ومن غير فهم كافى، وهنا ييجى دور العريس... هو اللى معاه البوصلة، واللى لازم يوجه الليلة دى للسلام، مش للعنف، للود، مش للضغط".

وواصلت: "أنا بطلب من كل شاب، خليك رحيم، خليك حنون، خليك فاهم إنك بتتعامل مع بنت داخلة على حياة جديدة بكل تفاصيلها، مش بس علاقة جسدية، لأ، دى شراكة روحية وإنسانية كاملة. ولو تعبتوا يومها أو حسيتوا إنكم مش قادرين، عادى، ارتاحوا، مفيش مشكلة. المهم أن البداية تكون صح، فيها طمأنينة وحب وستر".

وأضافت: أوصى كل عريس وعروسة بركعتين قبل أى شيء، نبدأ بالبركة، نبدأ بالدعاء، نبدأ بسؤال ربنا إنه يبارك فى البيت ده ويحفظكم من كل شر، افتكروا دعاء النبى صلى الله عليه وسلم: بسم الله، اللهم جنبنا الشيطان وجنب الشيطان ما رزقتنا، ده دعاء بسيط لكن أثره كبير فى حياتكم".

وأردفت: "فى بنات كتير للأسف داخلين الليلة دى بخوف شديد، بسبب معلومات غلط أو تجارب سلبية وصلت لهم، وده خلّى فى صور مشوهة للعلاقة دي.. السرية فى الأمور دى مطلوبة، وخصوصيتها مقدسة. ما فيش غير زوجك اللى تتكلمى معاه فى التفاصيل دي. هو الوحيد اللى من حقه يسمع ويعرف ويحتوي".

وتابعت: "الرجولة مش إثبات جسدى، الرجولة الحقيقية فى الليلة دى هى شهامة، صبر، تفاهم، واحتواء.. وإنك تكون راقى لدرجة تخليها ترتاح وتثق فيك. ولو حصل أن أول ليلة ما كانتش مثالية، مش نهاية الدنيا، بس اللى هتكسبه إنك كسبت شريكة عمرك بثقة، ودى البداية الحقيقية لحياة سعيدة بإذن الله".