ليه مصر قررت تطلق التأشيرة العاجلة إلكترونيا؟

في وقت كل دول العالم بتشتغل على جذب السياحة والاستثمار، مصر بتتحرك خطوة جديدة وذكية، خطوة هدفها تسهل الطريق قدام أي حد ناوي يزور مصر، وتفتح الباب على مصراعيه قدام السياحة والاستثمار.

الحكومة أعلنت عن إطلاق التأشيرة العاجلة إلكترونيا، واللي هتبدأ فعلياً من مطار القاهرة الدولي قريب جدا، وبعد كده هتتوسع لباقي مطارات مصر.

إيه هي الفكرة ببساطة؟
بدل ما السائح يوصل المطار ويضيع وقت في الورق والإجراءات، مصر بتقدم له تأشيرة فورية وسهلة من خلال:

• موقع إلكتروني رسمي.
• تطبيق على الموبايل.
• أكشاك إلكترونية في صالة الوصول.

يعني كل حاجة تبقى جاهزة في دقائق، والسائح يبدأ رحلته من غير أي تعطيل.

الخطة هتتنفذ إزاي؟

أول تجربة: في مطار القاهرة الدولي.
وبعدين: في 7 مطارات تانية.
وفي النهاية: تعميم النظام على كل المطارات الدولية (14 مطار).

طيب إيه علاقة ده بالاقتصاد والاستثمار؟

الحقيقة إن السياحة مش مجرد ناس بتيجي تزور الأهرامات وتروح البحر لا،
السياحة بتدور اقتصاد كبير وبتشغل معاها سلسلة طويلة جدا من القطاعات، زي:

• الفنادق والشقق الفندقية.
• شركات النقل والمواصلات.
• المطاعم والكافيهات.
• الشركات السياحية والمرشدين.
• الحرفيين وأصحاب المشروعات الصغيرة.
• وحتى المولات والأسواق التجارية.

السياحة كمان بتقوي قطاعات تانية زي:

تصدير العقار:
السياح اللي بيزوروا مصر بيبقوا أكتر ناس مهتمة يشتروا عقارات هنا، خصوصاً مع وجود تسهيلات للأجانب.

الاستثمار الصناعي والخدمي:
أي مستثمر بييجي بلد بيحب يجربها الأول كسائح، يشوف استقرارها، سهولة الحركة فيها، وبعدين يفكر يستثمر.

المعارض والمؤتمرات:
زي المنتدى المصري - الأمريكي اللي مصر بتستعد له علشان تجذب شركات أمريكية كبيرة.

والأرقام بتتكلم
السياحة جابت لمصر في 2024 حوالي 15.3 مليار دولار، بزيادة واضحة عن السنة اللي قبلها، والمستهدف دلوقتي إن الرقم ده يكبر أكتر مع تسهيل دخول السياح.

إيه اللي محتاجين نركز عليه علشان الخطوة دي تنجح بجد؟

• توحيد الثقافة والروح:
لازم كل الناس اللي بتشتغل في المنظومة دي، من أول العاملين في صالة الوصول لحد وزير الطيران نفسه، يكون عندهم نفس الثقافة ونفس الهدف، وهو تقديم أفضل خدمة تحافظ على صورة مصر وتريح السائح.

• تدريب كل فرق العمل في المطارات.
• تعريف السائح بالخدمة قبل ما يركب الطيارة.
• متابعة دقيقة لكل حاجة بتحصل علشان نحسن بسرعة.

الخلاصة ان مصر بتتحرك بشكل عملي علشان تثبت إنها جاهزة تستقبل العالم كله، مش بس كسياحة، لكن كفرصة استثمارية كبيرة.
واللي بيتعمل النهاردة هدفه يوصلنا لبكرة واحنا بلد أسهل، أسرع، وأكتر جذب للسياحة والاستثمار.
والأهم من ده كله، إن ده بينعكس على كل واحد فيناسواء  فرص شغل أكتر، دخل أعلى، واقتصاد أقوى.