بتفرح جيل التسعينيات تاني.. أميرة تحقق أحلام البنات بعروسة كرنبة

لكل منا ذكريات ومواقف محفورة بداخله مهما مرت السنوات، وذكريات الطفولة مرتبطة دائمًا بالألعاب والهدايا وخصوصًا جيل التمانينات والتسعينات وهو جيل ما قبل السوشيال ميديا فكانت الألعاب الجماعية والعرائس والدباديب هي الألعاب المعتادة في هذه الفترة، ولأن كل فترة تنتشر لعبة أو عروسة معينة فكانت العروسة "كرنبة"، من أشهر عرائس التسعينات وتقريبًا عند كل الفتيات الصغار.

العروسة كرنبة تميزت بملامحها المبهجة وملابسها الطفولية ووزنها الزائد وشعرها الوردي، ولكن مع الوقت اختفت وظهرت عرائس أخرى بأشكال مختلفة ولكنها ظلت العروسة الأجمل من بينهم و لن تختفى من ذاكرة كل من كان يمتلكها، لتعود من جديد على صفحات السوشيال ميديا وتفتح صندوق ذكرياتنا من تانى وذلك بعد ما قررت أميرة إبراهيم أن تفرح جيل الثمانينات والتسعينات بـ"كرنبة".

أميره إبراهيم شاكر من محافظة بني سويف بسبب أطفالها الصغار أسعدت جيل الثمانينات والتسعينات بعروستهم المحببة كرنبة وفى حوارها لـ اليوم السابع قالت " أنا عندي طفلين وبحب دائما اشترى لهم ألعاب ولكن كانت دائما بتتكسر منهم ومش بتقعد فترة كبيرة فجاتلي فكره الألعاب المستورده وبحثت كتير جدا على الموضوع ده  وقولت أكيد فى لعب مستورده إستوك  زي الملابس مثلا،  قعدت أدور حوالي شهرين والحمد لله وصلت لأماكن مختلفة بتوفر الألعاب دى وبجودة كويسة وبسعر بسيط، فقولت أعمل جروب أجيب كميات وأعرضها والناس أكيد هتتبسط وتحب ده وفعلا لقيت قبول كبير جدا والناس بدأت تبعتلى، وعرضت كل العرائس وكل الألعاب الهارد والسوفت والمعدن وكلها مستوردة".

وأضافت: "أما بخصوص العروسة كرنبة هي مكنتش عندي وأنا صغيرة ولا كنت أعرفها، أنا كنت بشتري لعب فهى جت قدامي وحبيت شكلها أوي فى جبتها فى الأول عادي ولما حطيت صورتها على الجروب لقيت تعليقات كتير جدًا والناس كلها بتسألنى عليها، وفيه مسدجات مؤثرة بتتبعتلى بسبب العروسة دى بيبعتولى: "أرجوكي عايزة عروسة كرنبة أنا أول ماشوفتها رجعت طفلة وحياتي وذكرياتي كلها معاها"، وبقي يحكولي كل مواقفهم مع كرنبة بكل راحة وأنا بستقبل ده منهم بحب، يعني كلمتني بنت بتتعالج نفسيا والدكتور طلب منها تجيب عروسة كرنبة أكيد كان فيه سبب وفعلا جبتهالها، وكلمتني بعدها بفترة كانت طايرة من الفرحة وبعتتلى روشتة الدكتور إنها بقت كويسة خالص وده كان سبب كبير فى شفائها وفرحت أوي، وواحدة تانية حكتلى إن باباها زمان جبلها عروسة كرنبة بأول مرتب ليه وفرحها وبباها حاليًا متوفي ولما جبتلها عروسة كرنبة افتكرت أسعد أيامها مع والدها، ومن ضمن المواقف كانت لشخص نزل من السفر مخصوص عشان ياخد العروسة كرنبة ويديها لمراته هدية لأنها كانت مريضة وهو بيحاول يجيبلها أكتر حاجة بتحبها وهى العروسة كرنبة".

وتابعت: كلها مواقف موثرة جدًا بالنسبالي، أنا عشت فى حياة كل شخص وحطيت نفسي مكانه وكنت بحط نفسي فى تحدي إني أقدر أوفر ليه حاجة أكون سبب في فرحته مش قادرة أوصف ببقى قد إيه مبسوطة وأنا بقدر أوفر ده للناس وأفرحهم، الحقيقة عروسة كرنبه فيها سحر رهيب تخلي الكل يحبها دون هي رهيبة فعلاً لما بشوفها بحس براحة نفسية رهيبه".

عروسة التسعينات

عروسة كرنبة الصغيرة

عروسة كرنبة

عروسة

كرنبة