آسر ياسين حديث الساعة بعد ظهوره مع والدته ببرنامج صاحبة السعادة

حل النجم آسر ياسين ووالدته السيدة منى الدغيدي، ضيفين على الفنانة والإعلامية إسعاد يونس ببرنامجها "صاحبة السعادة" على قناة "DMC"، للحديث عن بداياته الفنية وكيفية دخوله إلى عالم التمثيل، وسرعان ما تداولت تصريحاته عبر منصات السوشيال ميديا المختلفة وتصدرت عناوين الصحف ليصبح حديث الساعة والتريند.

نستعرض أبرز تصريحات آسر ياسين في برنامج صاحبة السعادة:

- إسعاد يونس من الناس اللى دعمتنى بداية من فيلم "رسائل البحر"، ومن الشخصيات المؤثرة جدا واللى بحترمها وكنت دائما بتمنى أكون فى البرنامج بتاعك، والحمد لله وقد كان.

- كنت خجول وسهير البابلى قالتلى انت بالذوق والأدب ده مش هتكمل، فركزت فى الشغل أكتر وربنا حطلى فى طريقى ولاد حلال منهم شريف عرفة وحضرتك، وحطونى فى الشغل اللى عاوزة وهو الحب والإخلاص.

- مكنتش بفكر إنى أمثل والتمثيل جه بالصدفة، والبداية قدمت مسرحية فى مسرح الجامعة فحبيت التمثيل، والحمد لله ربنا وفقى وحط فى سكتى ولاد الحلال.

- حلم حياتى أمثل مع الفنانة إسعاد يونس ولو مشهد، وبحب مسلسل "100 وش".

- انا ماشى مع اللى ربنا كاتبهولى ومسلم للفكرة دى وده اللى مخلينى مرتاح، وفى الآخر ربنا يديك اللى شبه نيتك طالما نيتك صادقة.

- المخرج داوود عبد السيد كلمنى وطلب مقابلتى وعرض عليا الفيلم، ومصدقتش من الفرحة وكنت مبسوط من الفكرة وقرأت السيناريو فى المطبخ، حتى لما الفيلم نزل مكنتش مصدق إنى أكون فى فيلم لـ داوود عبد السيد، ودا كان من طموحاتى.

- حماتى كانت مفكّرة إنى "بتهته" بعد فيلم رسائل البحر.

- مسلسل الكتيبة 101 حسيت تجاهه بمسؤولية وواجب وشرف، وكان لازم نرد الدين للناس الحقيقية اللى بتحافظ على أمن مصر، و بحب دورى فى مسلسل "بدون سابق إنذار.