ليه البنك المركزي قرر يثبت الفايدة عند 24%؟ وإزاي القرار ده يخصك كمواطن؟

في اجتماع لجنة السياسة النقدية يوم الخميس 10 يوليو 2025، البنك المركزي المصري أعلن تثبيت سعر الفايدة عند 24% للإيداع و25% للإقراض.

فيه ناس أول ما سمعت الرقم ده قالت يعني إيه؟ وإزاي ده هيأثر عليا أنا كمواطن أو على الاقتصاد بشكل عام؟ تعالوا نفهم الموضوع خطوة خطوة وبطريقة بسيطة.

أولا: ليه البنك المركزي عمل كده؟
البنك المركزي بيتابع مؤشرات كتير جدا قبل ما ياخد أي قرار بخصوص الفايدة، أهمها:

التضخم: المعدل السنوي للتضخم نزل لـ 14.9% في يونيو بعد ما كان 16.5% في بداية السنة. يعني الأسعار فعليا بدأت تهدى شوية، وده مؤشر إن سياسات البنك بدأت تجيب نتيجة.

النمو الاقتصادي: الاقتصاد المصري بيحقق تعافي واضح، والنمو وصل 4.8% في أول 6 شهور من 2025 مقارنة بـ 2.4% لنفس الفترة السنة اللي فاتت.

الوضع العالمي: فيه اضطرابات سياسية وتجارية في العالم، وأسعار البترول بقت غير مستقرة، فالبنوك المركزية الكبيرة برة زي الفيدرالي الأمريكي بقت حذرة جدا في قراراتها.

كل ده خلا البنك المركزي يقرر ياخد نفس عميق ويثبت الفايدة بدل ما يستعجل ويخفضها.

يعني إيه تثبيت الفايدة؟ وليه ده مهم؟
سعر الفايدة هو الأداة الأساسية اللي البنك المركزي بيستخدمها عشان يسيطر على الأسعار او بمعنى تانى التضخم

ما الفايدة تكون عالية:

الاقتراض بيقل فالناس والشركات بتاخد قروض أقل فالطلب على السلع والخدمات بيهدى شوية فالأسعار تستقر أو تنزل فلما بتزيد الناس بتفضل تحط فلوسها في البنوك عشان العائد المرتفع بدل ما تصرفها في السوق.

البنك المركزي هنا بيحاول يكمل سياسة فرملة الأسعار لحد ما يتأكد إن التضخم نزل فعلا بشكل مستدام.
طيب وإيه تأثير القرار ده علينا كمواطنين؟

الإيجابي ان الأسعار ممكن تهدى أكتر في الشهور الجاية لو الأمور استمرت زي ما هي.

لكن التحديات ان القروض والتمويلات هتفضل مكلفة نسبيا سواء للشركات أو الأفراد.

الاستثمار محتاج شوية صبر لحد ما الفايدة تبدأ تنزل تدريجيا.

طيب إيه المتوقع الفترة الجاية؟
البنك المركزي واضح جدا إنه مش هيستعجل في خفض الفايدة، وده منطقي جدا لأن أي تخفيض سريع ممكن يسبب ضغوط تضخمية جديدة. الهدف دلوقتي اننا نوصل التضخم لـ 7% ±2% فى نهاية 2026، وساعتها هتبدأ دورة جديدة من التيسير النقدي اللى هو خفض الفوايد تدريجيا يعنى

خلاصة الموضوع:
قرار تثبيت الفايدة هو خطوة محسوبة عشان يحافظ على الاستقرار اللي بدأ يظهر في السوق. آه، ممكن ناس تتمنى خفض الفايدة بسرعة، لكن الأهم دلوقتي إننا نطمن إن الأسعار تستقر بشكل حقيقي وما يحصلش ارتداد للأسعار تاني.

البنك المركزي بيلعب على النَفَس الطويل عشان التضخم ينزل من غير ما الاقتصاد يتعرض لهزة مفاجئة.