ليه البنات لازم يجربوا الكيك بوكسينج؟.. رياضة بتقويها أكتر من الجيم

بدأت حلقات برنامج "أول مرة كبنت" تطرح تجارب غير تقليدية للبنات، وواحدة من أقوى الحلقات كانت لما خاضت منة تجربة الكيك بوكسينج لأول مرة في حياتها.

في البداية، دخلت منة التمرين وهي فاكرة إن الموضوع بسيط، لبست الجوانتي، ووقفت قدام المدرب على أساس إنها جاية تضرب وتثبت إنها قوية، لكن النتيجة كانت عكس كده تمامًا.

حاولت تضرب الكابتن بأول بوكس، لكن الضربة طلعت خفيفة جدًا، رجليها كانت بتتحرك غلط، وتوازنها وقع أكتر من مرة، والمدرب كان بيضحك وبيصحّح كل تفصيلة. لكن المدرب ماكنش أي حد… ده كان الكابتن محمود حفني، مدرب محترف، استلمها من أول حركة غلط وبدأ يعلمها من الصفر.

شرح لها إزاي توقف صح، إزاي تضرب صح، وإزاي تتحكم في نفسها قبل ما تتحكم في ضربتها. ومن ضربة ضعيفة في أول التمرين، وصلت منة في آخر التمرين لضربات واضحة وسريعة، قدرت توازن جسمها وتستخدم قوتها بذكاء مش بعشوائية.

الكابتن محمود قال:
"الكيك بوكسينج من أهم الرياضات للبنات. مش بس علشان الجسم والقوة، لكن كمان علشان السرعة، التحكم، والتركيز"

وأضاف:  "البنت بتتعلم أسرع من الولد… ومنة كانت نموذج ممتاز، بتلتقط بسرعة، بس زي أي مبتدئ، فيه حاجات بتتصحح مع الوقت"

وأكد إن التمرين ده بيفيد البنت أكتر من الجيم، لأنه بيعلمها ازاي تستخدم قوتها مش بس تبنيها ويخليها تعرف تتصرف لو اتحطت في أي موقف بثبات، وسرعة بديهة، وتحكم.

تجربة منة كانت البداية، لكن الرسالة كانت أوضح: كل بنت تستحق تبقى قوية وتعرف تستخدم قوتها صح.