محمد حلمي: مبحبش المذاكرة.. وكنت بدور على فرصة 10 دقايق عالمسرح

علق ستاند آب كوميديان وصانع المحتوى محمد حلمي، على دراسته وفترة الثانوية العامة ودراسته الجامعية، خاصة وأنه تخرج من كلية الهندسة، إلا أنه اتجه إلى صناعة المحتوى الكوميدي.

وقال حلمي خلال لقائه مع الإعلامية منى الشاذلي ببرنامج "معكم" الذي يذاع على قناة "on": "البعض بيظن ان السنتين بتوع الثانوية العامة هما عنق الزجاجة، أنا ذاكرت جدا في الثانوية العامة رغم اني مبحبش المذاكرة، وجبت مجموع كبير في الثانوية العامة، ودخلت كلية هندسة جامعة الإسكندرية".

وأضاف: "أول يوم ليا في كلية هندسة، حضرت محاضرة لسنة رابعة ميكانيكا، رغم اني إعدادي هندسة، وقعدت ساعة كاملة في محاضرة مش بتاعتي، وكنت قاعد عامل نفسي فاهم".

وتابع: "بالنسبة للاستاند آب كوميدي، بدأت وأنا في الجامعة، على مرحلتين، في 2013 كانت أول مرة أمسك مايك، وكنت دايما بكتب ومكنتش عارف استغل ده امتى، وكنت بحب جدا المسرح ونفسي أطلع عليه، وكنت بطلب من الناس اللي بحبها في المجال ده إني أخذ من أي اسكتيش ولو 10 دقايق، وشاركت في برامج أهمهم مع الفنان أحمد أمين".

وقال: "كل كتابة كوميدية مختلفة عن التانية ولكن كاستاند آب كوميديان كنت محتاج أتدرب كويس عشان هقابل الجمهور، ففي 2013 أخدت 10 دقايق، وقعدت 3 سنين أدور على فرصة أني أطلع للجمهور، وفي 2016 أخدت الفرصة وقابلني حد وقالي في حفلة بكرة هتلحقها؟ قولتله هلحقها، وكان معايا 80 واحد من صحابي".