كيشو لـ اليوم السابع من أمريكا: أوافق على التجنيس لتحقيق ميدالية أولمبية ثانية.. معاش ميدالية طوكيو 1500 جنيه وماعنديش شقة للجواز.. اشتغلت فى محل فراخ وتعرضت لأزمة نفسية بعد الأولمبياد.. أنا أهلاوى وبشجع الريال

يعد محمد إبراهيم كيشو لاعب منتخب المصارعة من اللاعبين المميزين فى اللعبة، حيث يسير على خطى كرم جابر بعد أن نجح فى تحقيق ميدالية أولمبية بأولمبياد طوكيو، وهى الميدالية التى تم تحقيقها بعد مرور 16 عاما منذ ذهبية كرم جابر بأولمبياد أثينا.

وبعد مشاركة كيشو فى دورة باريس 2024 أثار الجدل بعد الأزمة التى تعرض لها هناك، وبعد عودته اختفى عن المشاركة، ولم يعد متواجدا بشكل كاف على الساحة الرياضية، ثم أعلن اعتزاله فجأة وغادر إلى أمريكا، فكان معه الحوار التالى لمعرفة تفاصيل وأسباب اعتزاله ومغادرة مصر.

ما سبب الاعتزال؟

مستقبل مش واضح والوعود من أولمبياد طوكيو متحققتش وخلافات مع اتحاد المصارعة.

لماذا تتواجد الآن فى أمريكا؟

علشان أبدأ حياة جديدة من الصفر من غير ما حد يعطلنى عن مستقبلى أو يوقف فى طريقى، بعيدا عن إدارة بتفشل الناجح، إدارة مش بتحترم لاعب ومفيش تقدير ولا مراعاة لأى شاب بيبنى مستقبله.

هل تواصل معك أحد المسئولين لإقناعك بالتراجع عن الاعتزال؟

أحمد الجندى تواصل معى وبشكره على اهتمامه وده الفرق لما يكون حد مسئول رياضى وحاسس بلاعب زيه، لكن الباقى علشان مايعرفش يعنى إيه رياضة محدش كلمنى.

هل تلقيت عروضا للتجنيس؟

العروض بتكون متاحة فى فترة ما بعد الأولمبياد، لأن العقوبة بتكون فقط عامين وفرصة التجنيس بتكون نسبة تحقيقها كبيرة ولو اتعرض عليا هوافق لأنى حلمى لسه موجود وعايز أحققه وهو إنى أحصل على ميدالية تانية فى الأولمبياد حتى لو ما لعبتش الأولمبياد اللى جاية اللى بعدها هكون موجود فيها تحت أى ظرف.

كنت تحلم بميدالية أولمبية ثانية.. ماذا تغير؟

التغير اللى حصل هو لقيت نفسى من غير المصارعة هتحصل على 1500 جنيه معاش على الميدالية الأولمبية ده غير إن مفيش تأمين طبى ماعنديش بيت أحقق حلمى فيه لأنى شاب وعايز أتجوز وأكون أسرة بس ده صعب يتحقق وأنا باخد المعاش ده.

لو عاوزين نبنى بطل مصارعة التكلفة كام؟

الإدارة المسئولة عن بناء البطل بيكون دورها أكبر وأهم لأنها بتحط خطط وبرامج تدريبية وبتوفر بيئة مناسبة تخلى يكون عندك أبطال كتير مش بطل واحد، لكن المسئول بيفكر فى مصالحه الشخصية فقط وليس بناء بطل عالم أو أولمبى.

أين اختفى كيشو بعد أولمبياد باريس؟

بعد الخسارة والأزمة اللى مريت بيها فى باريس كانت صعبة عليا نفسيا وجسديا، ومريت بلحظات صعبة وأزمة نفسية أول مرة تعدى عليا فى مسيرتى الرياضية، وبالمناسبة أنا بلعب مصارعة بقالى 20 سنة، وبعد المساندة من أهلى وصحابى قدرت أتخطى الفترة الصعبة دى وبالفعل أرسلت خطابا رسميا لاتحاد المصارعة فى شهر أكتوبر الماضى، أنى أحتاج عمل إعداد فى المركز الأولمبى بجانب دراستى الجامعية، التى طالت 9 سنين ولم أتحصل على الشهادة ولم يتم الرد حتى الآن.

القريب من كيشو يعرف علاقتك القوية بوالدتك.. كلمنا عن دورها معك

أمى طول الوقت معايا وتدعمنى فى كل ظروفى الصعبة وأكتر حد كنت ببقى عايز أفرحه، لأنها تعبت معايا كتير وضحت بوقتها وحياتها لأجلى وأول واحدة بلاقيها بتدعمنى فى الخسارة والظروف الصعبة وبترجعلى ثقتى من جديد، فدعواتها أنقذتنى كتير فى حياتى مش بس الرياضة، لأنها دائما تقولى "أنا راضية عليك دنيا وآخرة" وفرحة أمى بالنسبالى أحلى شعور وأحلى حاجة بتحصلى فى حياتى.

دائما والدتك تقول إنك تعبت فى حياتك، ما الصعوبات اللى واجهتك السنين اللى فاتت؟

كنت بشتغل وأنا صغير فى الإجازة المدرسية فى محل "فراخ" واشتغلت فى المبانى كنت أذهب مع أبى للعمل، وأكثر ما يشعرنى بالفخر أننى كنت أحاول فى الصغر أن أصل لشىء فى حياتى لأننا كنا نعيش فى حى بسيط وظروف صعبة، لكن دعم الأهل جعلنى أصل للأولمبياد والعالمية.

بعد الأزمة قلت حسبى الله ونعم الوكيل.. كنت بتوجهها لمين؟

كلمة حسبى الله ونعم الوكيل دايما بقولها فى كل أذان، على كل اللى ظلمنى وكان السبب فى كل حاجة حصلتلى.

ما رد فعل أهلك عند معرفة خبر القبض عليك فى باريس؟

أزمة باريس كانت صعبة عليا وعلى أهلى وكل الناس اللى بتحبنى بجد من قلبها، وخلاص عدت ومش حابب أتكلم فى تفاصيل.

فى رأيك هل هناك لاعبون يتناولون المنشطات لتحقيق ميداليات فى المصارعة أو غيرها؟

بخصوص موضوع المنشطات وإن لاعب يتعاطى منشطات ليحقق المكسب هذا عدم وعى وثقافة رياضية، وللأسف العقوبة صعبة 4 سنوات إيقاف عن النشاط، فدورك تثقف نفسك وتشارك فى الدورات المتاحة حاليا فى مكافحة المنشطات.

بتابع كورة؟ وبتشجع فريق إيه؟

الأهلى وريال مدريد المفضلان بالنسبة لى.

ماذا ينقص المصارعة لتحقيق ذهبية أولمبية بعد كرم جابر؟

سؤال وقته متأخر، لأن كان فى فرصة تحقيق ميدالية ذهبية فى الدورات السابقة أنا وزملائى فى طوكيو كنا أقرب للميداليات، لكن هناك أزمات وكواليس تحدث فى منظومة المصارعة ولا أحد يعلم ولا أحد يحاسب، نريد أشخاصا كانت تمارس المصارعة حتى نشعر بنتيجة الجهد الذى نبذله، نحتاج من لديهم ضمير وإنسانية لأن كل عنصر فى المصارعة كلاعب أو حكم أو مدرب لا يأخذ حقه رغم أن الدولة توفر كل الدعم.

ما نصيحتك للأبطال للوصول إلى حلمهم؟

نصيحتى لكل لاعب هى الاستمرارية لأنها ستوصلك لحلمك وتجعلك تحافظ عليه، بالإضافة إلى الاجتهاد المتواصل وثقتك فى نفسك خارج الملعب والظروف التى ستواجهها، ودافع عن حقوقك ولا تخاف فأنت أهم عنصر أساسى يبنى عليه المستقبل.