نسرين طافش تتغزل فى زوجها: أحسن راجل فى الدنيا وربنا جمعنا من غير تخطيط

كشفت النجمة نسرين طافش كواليس زواجها من رجل الأعمال أحمد جوهر والذى جاء بشكل مفاجئ، كما تحدثت عن حالة السعادة الكبيرة التى تعيشها حالياً منذ زواجها خاصة بعدما نشرت مؤخراً عبارة "الزواج بالشريك الصحيح أعظم النعمة على الإطلاق" على حسابها بموقع انستجرام حيث لمستها هذه العبارة لأنها تعيش هذه الحالة.

اختيار الشريك المناسب يجعل الحياة أجمل

وقالت نسرين طافش خلال لقائها مع تليفزيون اليوم السابع: "نشرت عبارة الزواج بالشريك الصحيح أعظم النعمة على الإطلاق عندي، لكن الحقيقة أنها كانت اقتباس ولكن الكلام لمسني جداً، لأنه يعبر عن حالة أنا بعيشها بالفعل ولسه مستمرة فيها، فأنا مؤمنة إنه لما يكون فى شريكين مناسبين لبعض، حياتك كلها بتتظبط. سبحان الله! حتى نفسياً بيكون عندك دافع تعمل شغل أحسن، وتكون إنسان أجمل، وتبتكر أكتر، وتركز فى شغلك وفى حياتك، فتعطى من قلبك أكتر وتنجح أكتر".

وعن مفاجأتها للجمهور بإعلان زواجها، رغم أن آخر تصريحاتها عن الزواج كانت تؤكد أن شروطها صعبة جداً، أوضحت: "فعلاً أنا كنت دايماً بقول إن شروط الزواج عندي صعبة، ومع الوقت بتبقى أصعب، وده طبيعي مع أي ست بيكون عندها نضج إنسانى وعاطفى، فمع العمر مقاييسك بتعلى وما بتبقاش زى لما كنتِ مراهقة أو فى المدرسة، وقت كنتِ لسه بتتعرفى على الدنيا وبتحاولى تحددى أنتِ عايزة إيه".

زوجى أحمد حقق المعادلة الصعبة

وأضافت نسرين طافش: "النضج بيخلى اختياراتك أوضح وأدق. فى النهاية، كل شىء قسمة ونصيب، وأحمد حقق المعادلة الصعبة بالنسبة لى. أنا بشوف أن رب العالمين جمعنا، وفي حاجات بتحصل فجأة من غير ما تخطيطى لها، وده اللى حصل معايا، فهو إنسان ذكى جداً، وعنده وعى فطرى ما شاء الله، وأحسن راجل فى الدنيا بسم الله ما شاء الله، أنا حسيت إنه الشخص اللي عايزة أكمل حياتا معاه، رغم إن الفترة الأخيرة كنت مركزة جداً فى شغلى ومش بفكر فى الزواج إطلاقاً، لكنه فعلاً خطفنى".

وعن الشروط التي كانت تعتبرها صعبة جداً، والتى وجدتها فى زوجها أحمد، قالت نسرين:"ليست شروط بالمعنى الحرفى، وانمامقومات معينة بحلم بيها، لكن مع أحمد لقيت إن مفيش حاجة صعبة، كل الأمور ماشية بسلاسة وفى حالة انسجام طبيعى جداً، فى حاجات بتحصل لوحدها بدون أى مجهود أو تخطيط، وده من فضل رب العالمين، أنا ما قعدتش أحلل ولا خططت كتير، لأن أحياناً لما بتخطط زيادة الأمور ما بتمشيش، لكن خطة ربنا دائماً أجمل وأحلى. أنا اعتمدت على إحساسى، والحمد لله رب العالمين ما خيبنى".

نسرين طافش وزوجها أحمد جوهر

نسرين طافش وزوجها

نسرين طافش مع زوجها احمد جوهر