ميرال عبد الرؤوف: التعب بيهون طول ما في تقدير.. وزوجي هو الداعم الحقيقي

عبّرت الدكتورة ميرال عبد الرؤوف المدير الإقليمي بإحدى شركات الأدوية، عن نظرتها الصادقة للتوازن بين العمل والحياة الشخصية، مؤكدة أن الرضا الداخلي يأتي من التفاصيل اليومية الصغيرة التي تمنح المرأة شعورًا بالنجاح والإنجاز، سواء في بيتها أو عملها أو علاقتها بمن حولها.

وخلال حديثها في برنامج "ست ستات"، على قناة DMC، قالت ميرال: "بحس إني مبسوطة باللي بعمله، وفرحانة بالريوردز الصغيرة اللي بتيجي كل يوم.. ولادي كويسين، بيتي حلو، شغلي ناجح، وجوزي مبسوط.. أنا كده مبسوطة، وتعبانة أكيد، بس التعب بيهون طول ما فيه حب وتقدير حواليّ."

وأكدت ميرال أن أكثر ما يعوّضها عن المجهود هو الإحساس بالحب ممن حولها، قائلة:"كل بني آدم بيعبّر عن الحب بطريقته.. اللي بيقولي شكراً، أو بيقدّر اللي بعمله، ده لوحده بيشحنني.. ببقى ماكينة بتشتغل."

وعندما سُئلت عن "سي محمد"، علّقت ضاحكة: "آه سي محمد مقدّر طبعًا.. هو شخصيته أقوى مني وصوته عالي، فببقى قطة سيامي قدامه. الناس بتتريق عليا، يقولولي فين القوة؟ بقولهم: لأ ده سي محمد.. قدامه لازم أبقى كده!"

وأضافت: "هو بيخليني أحس إنه شايل عني، فوجوده بيخليني أحب أسيب له المساحة دي. من غيره، ما كنتش هقدر أدي الإفورت ده كله.. الدعم والتشجيع والطبطبة مهمين جدًا."

واختتمت ميرال حديثها بتأكيد أن الذكاء الحقيقي هو في معرفة متى تكوني قوية، ومتى تُفسحي المجال لشريك حياتك ليشعر بدوره، قائلة: "أنا قادرة، وناجحة، وقوية، بس عارفة إمتى أكون ست بيت، وإمتى أقول: سي محمد قال خلاص".