بطل مزلقان بنى سويف: ما فكرتش فى نفسى ولقيت جسمى سبقنى لإنقاذ الشاب

قال طارق محمد برس عامل مزلقان كوبرى السادات بمدينة بنى سويف الذى أنقذ شابا قبل أن يصدمه القطار: "ما فكرتش فى نفسى لقيت جسمي هو اللي سبقني لإنقاذ الشاب".

وقال عم طارق عامل المزلقان لـ "اليوم السابع": إحنا بنقف على المزلقان بالتناوب أنا وزمايلي، وبنتعامل مع كل قطار بيعدي كأنه موقف خطير، عشان أي تهاون ممكن يضيع روح، شغلانتنا يمكن الناس شايفاها بسيطة، بس هي في الحقيقة أمان للناس كلها. طول الوقت ماسك الصفارة وبنبه أي حد يقف وما يعديش لحد ما القطر يمر.

وتابع عم طارق: يوم الواقعة كنت واقف كعادتي، سمعت صوت القطر جاي، وبدأت أصفر وأنبه، لقيت شاب مُصَمم إنه يعدي بسرعة كأنه سابق الموت، فضلت أصفر وأزعق لكن هو ما ردش وفضل ماشي.

وواصل عم طارق حديثه: "في اللحظة دي حسيت إن ثانية واحدة ممكن تفرق بين حياة وموت.. أنا ما حسبتهاش ومفكرتش في نفسي، لقيت جسمي هو اللي سبقني وجريت عليه وشديته بقوة بعيد عن القضبان، والقطر كان على بعد لحظة واحدة".

وأكد طارق، أنه كان لا يفكر سوى فى إنقاذ حياة الشاب، وتابع قائلا: "حتى لو أنا اللي اتخبط الحمد لله ربنا سترها، وأنا بعتبر اللي عملته ده واجب، مش بطولة، اللي أهم عندي إن الناس كلها تاخد بالها وما تستهونش بالمزلقان، لأنه مش لعبة ولا مغامرة وده موت محقق.

يذكر أن "طارق محمد برس" عامل مزلقان بمحطة قطار السادات بمحافظة بنى سويف، أنقذ شاباً قبل أن يدهسه القطار بلحظات، في مشهد بطولى سيطر على اهتمام مستخدمي مواقع التواصل الاجتماعي، وثمّن متداولو الفيديو شجاعة "عم طه" عامل المزلقان، الذى أنقذ حياة الشاب في لقطة بطولية، معتبرين أن ما قام به عامل المزلقان عمل شجاع يجب أن يُكرّم عليه.

عم طارق

عم طارق ينظم حركة المرور

عامل مزلقان بنى سويف