حسام داغر: بهاء الخطيب كان بيلعب ماتش كرة وقع مات

نعى الفنان حسام داغر، زميله الفنان الشاب بهاء الخطيب، والذي رحل أثناء لعبه "ماتش" كرة قدم، حيث كتب عبر صفحته على موقع التواصل الاجتماعى: "ده لسه متكلمين إنك تيجي تقعد معايا كام يوم في إسكندرية، وقلتلك هتحب قعدة بلكونتي على البحر علطول ورجعت أقولك خلينا في الشتا هيبقي أحلى الجو دلوقتي صيف وحر".

وأضاف: "خلاص لا بقى فيه شتا ولا صيف ولا حاجة الناس بتمشي فجأة إزاي كده لا حول ولا قوة إلا بالله دموعي منشفتش من يوم تيمور قلبي لسه موجوع تقوم تمشي فجأة إنت يعني إيه وقع وهو بيلعب كرة مات".

وواصل الفنان حسام داغر نعيه: "أنا عقلي هيجراله حاجة الثبات والعقل والصبر من عندك يا رب… بهاء الجميل المحترم الطيب أعرفه من وهو في مسرح الجامعة وقبل المعهد وبرضه كبر قدامي وكان ناجح في كل حاجة حتى مجاله وشغله الأساسي جنب التمثيل.. لو أعرف إنك هتمشي فجأة كنت قابلتك ومفضلناش نأجلها.. ليه يا ربي الطيبين المحترمين بيمشوا فجأه لا حول ولا قوة إلا بالله الصبر من عندك يا رب".

وكان السيناريست محمود جامايكا قد أعلن عن وفاة الممثل الشاب بهاء الخطيب، حيث كتب عبر حسابه: "هتوحشني يا صاحبي.. يا أنضف خلق الله.. ماتغلاش على اللي خلقك.. بس الغفلة وحشة ربنا يرحمك ويغفرلك ويسكنك فسيح جناته يا بهاء.. صاحبي وأخويا وعشرة عمري بهاء الخطيب في ذمة الله...إنا لله وإنا اليه راجعون... ادعوله فهو في أمس الحاجة للدعاء".