طفلة الشيبسى لتليفزيون اليوم السابع: "الراجل صعب عليا ومعرفش حاجة عن الفيديو"

استقبلت صالة "اليوم السابع" الطفلة هايدي بترحيب وتصفيق كبير، بعد أن تصدرت تريندات مواقع التواصل الاجتماعي خلال الساعات الماضية، إثر موقفها الإنساني المشرف، فقد قامت هايدي بإعطاء ثمن كيس رقائق البطاطس الذي كانت ترغب في شرائه لأحد المحتاجين، في لفتة أثرت قلوب المتابعين وأبرزت قيم العطاء والتعاطف.

وخلال اللقاء الذى قدمته الزميلة جيرمين شلبى، قالت الطفلة هايدى :"كنت رايحة أجيب كيس شيبسي بس لما شوفت الراجل صعب عليا واديته الخمسة جنيه ورجعت كيس الشيبسي، هو غلبان واللى اديتهوله ده حاجة قليلة جدا".

قصة الطفلة هايدي التي خطفت قلوب المصريين

وأضافت هايدى: "بابا فرح بيا أوى، وقالى هجيبلك كرتونة شيبسي، بابا وماما علمونى أنى أحب الناس وأساعدهم، وماكنتش عارفة حاجة عن انتشار الفيديو ولما رجعت البيت أختى هي اللى قالتلى أنت بقيت مشهورة على النت".

وقالت هدى والدة الطفلة هايدى:" إحنا دايما بنحاول نعلم بنتنا علي العطاء علي قد مانقدر، وهي بتشوفنا وبتعمل زيينا، ومش أول مرة تعمل كدا، عملتها كذا مرة، هي أصلا جات حكيتلي بعد ما عملت كدا، لأنها متعودة تحكيلي كل حاجة".

والدة هايدي: الخير البسيط له مقابل كبير

وأضافت والدة طفلة كيس الشيبسي: "لقيت أختي بتتصل بيا وتقولي شوفتي الفيديو بتاع بنتك الناس كلها بتتكلم عنه ومبسوطة بيه، وأنا الصراحة مكنتش شوفته، وأنا مبسوطة باللي بنتي عملته، والخير اللي بيتعمل مهما كان بسيط هاتلاقي المقابل خير".

قال محمد، والد الطفلة هايدي: "أنا معود أولادي على العطاء، وفخور بدعوات الناس لها بسبب موقفها النبيل".