كيف تختار الكلية المناسبة؟ نائب رئيس جامعة الأزهر يجيب (فيديو)

وجّه الدكتور سيد بكري، نائب رئيس جامعة الأزهر لشئون التعليم والطلاب، عدة نصائح مهمة للطلاب المقبلين على مرحلة التنسيق الجامعي، خاصة أولئك الذين لم يحددوا بعد وجهتهم الدراسية بشكل واضح.

وقال الدكتور بكري، خلال حوار مع الإعلامية مروة شتلة، ببرنامج "البيت"، المذاع على قناة الناس، اليوم الثلاثاء: "في الفترة الحالية، كثير من الطلاب بيبقوا لسه مش عارفين هم عايزين يدخلوا إيه أو يتجهوا لفين، وده طبيعي لأنهم لسه كانوا في مرحلة تركيز على المذاكرة والحفظ، لكن النصيحة الأولى: لو مش عارف أنت ميّال لإيه، بص لدرجاتك شوف إنت جبت مجموع أعلى في إيه، وابدأ من هنا، هل أنت ميّال للدراسات الأدبية؟ ولا العلمية؟ لو بتحب الحفظ والدراسات، يبقى ممكن تفكر في كليات زي الإعلام، أو اللغات والترجمة، أو الدراسات الإسلامية باللغات – ودي كليات قوية جداً، بتجمع بين الدين واللغة، وممكن تفتح لك مجالات كبيرة في الإعلام الديني وغيره".

وأكد الدكتور بكري، أن الأزهر يهتم بفتح مجالات جديدة داخل التخصصات الأدبية والعلمية، قائلًا: "إحنا حالياً بندرس إنشاء كلية جديدة للآثار والتراث والحضارة، علشان نضيف مجال جديد في قطاع الأدبي، خاصة للطلاب المهتمين بالإرشاد السياحي والتاريخ".

وفي رده على سؤال حول الكليات التي تحتاج لاختبارات قدرات، أوضح الدكتور بكري: "فيه كليات بتشترط اجتياز اختبار قدرات قبل التقديم، ودي بدأ التسجيل فيها بالفعل من يوم الاثنين الماضي، زي: كلية التربية الرياضية للبنين والبنات، كليات التمريض، وأقسام من كلية اللغات والدراسات الإنسانية للبنات.. التقديم بيتم من خلال موقع الجامعة، ولازم الطالب ينجح في اختبار القدرات أولًا، حتى لو لسه التنسيق ما طلعش".

وتابع نائب رئيس الجامعة حديثه عن أهمية تنويع المسارات في الكليات الأدبية: "قطاع الأدبي في الأزهر غني جدًا، عندنا الكليات الشرعية الأصيلة اللي خريجيها بيلاقوا فرص في المؤسسات الدينية زي الأوقاف ودار الإفتاء، وعندنا كمان كليات تطبيقية، زي الإعلام واللغات، اللي بتمكّن الطالب يشتغل في مجالات متنوعة بعد التخرج".

ووجه بنصيحة مهمة للطلاب: "خد وقتك وفكر بهدوء، واختار التخصص اللي يناسب ميولك وقدراتك. وحط دايمًا في بالك إن الهدف مش بس تدخل كلية، لكن كمان تتفوق وتشتغل وتحقق ذاتك بعد التخرج".