أحمد سعد لـ"معكم": اشتغلت نقاش وغنيت فى الأفراح وكنت بجيب طلبات الجيران بأجر

أكد النجم أحمد سعد، أنه كان يحب المزيكا منذ الصغر، كاشفا عن أن شقيقه الدكتور سامح بيحترم الفن وبيقدم له نصائح، وهربت من وانا عمرى 14 سنة من البيت واخترت أنى أروح أغنى فى الأفراح، وكنت بصرف على نفسى منها".

وأضاف أحمد سعد خلال حلوله ضيفا ببرنامج "معكم منى الشاذلى" الذى تقدمه الإعلامية منى الشاذلى على قناة on، اشتغلت فى مهن كتير، كاشفا عن موقف له كان سببا فى بداية أول عمل له، قائلا:"كنت بجيب طلبات البيت لأمى، وفى أحد المرات نزلت علشان أشترى عيش وانا فى الشارع فى ست طلبت منى أجبلها عيش وبعد ما إشتريت لها أعطتنى 5 قروش ففرحت بيها والموضوع لعب فى دماغى، فكنت كل ما أنزل من البيت الناس تطلب منى أجبلها أى حاجة ويدونى فلوس تمن التوصيل، واشتغلت كمان فى مهنة النقاشة".

تابع أحمد سعد:"معشتش طفولتى كنت بشتغل بدلا من اللعب فى الشارع،و حبيت أثبت نفسى، وكنت بقرأ القرآن والابتهالات الدينية، بعدها غنيت لأم كلثوم وعبد الوهاب، وكنا يوم الجمعة بنتجمع فى البيت مع بعض وكل واحد بيقول اللى عنده فى اليوم ده قدام العيلة".

وعبر أحمد سعد عن سعادته بنظرة الإعجاب التى يراها من أشقاءه، مؤكدا :"تعبت علشان أوريهم إنى كويس، وحاولت إثبات ذاتى".