متعب: هذه أسوأ بداية دورى فى تاريخ الأهلى.. ولازم الأمور تصفى بين اللاعبين

أعرب عماد متعب عن حزنه الشديد من المستوى الذي ظهر عليه لاعبو الفريق الأحمر في مباراتهم أمام إنبي بالدوري والتي انتهت بالتعادل 1-1، متسائلا: "فين لاعبي الأهلي؟ أنا مش شايف أي حاجة من لاعبي الأهلي، دي أسوأ بداية دوري في تاريخ الأهلي، كل مصر كانت متوقعة إن الأهلي هيكتسح الدوري كله".

وقال متعب، في تصريحات للاستديو التحليلي لقناة أون سبورت: "مش شايف أي حمية ولا ندية ولا روح ولا رجولة ولا أي حاجة، لاعبو الأهلي هم اللي بيحطوا نفسهم في موقف وحش".

وأضاف: "لما كنا بنخسر ماتش، كنا بنتمنى إن تاني ماتش يكون بكرة عشان نمحي الصورة بتاعتنا، دا حصل في الشوط الأول النهاردة، لكن محصلش خالص في الشوط التاني وتراجع رهيب في المستوى، والفكرة كلها في الإصرار والرجولة إنك تكسب، فيه لعيبة كانت بتحاول لآخر دقيقة، لكن فيه لعيبة كتير النهاردة رتمها واحد كسبنا خسران متعادل مش في دماغه".

وتابع: "لازم يكون فيه عزيمة وإصرار واللي بيفرق في الملعب رجولتك واصرارك واللي بيحصل فيه حاجة غلط والموضوع مش فني ولازم اللعيبة تقعد مع بعض وتتكلم وتبقى الدنيا صافية عشان الأمور تتحسن".

واستطرد: "مفيش نجوم على الأرض النجوم في السما بس، كله بيتساوى مع صفارة الحكم مفيش حاجة اسمها نجم برا أرض الملعب إنت نجم تبقى نجم جوا الملعب".

واختتم: "لاعيبة الأهلي لم تمتلك الروح ولا الإرادة لتحقيق المكسب.. حتى والفريق متقدم في النتيجة نفس الرتم، وهو متعادل نفس الرتم، الأداء كارثي من لاعيبة الاهلي في الماتش.. ومن بداية الدوري".

جاء تشكيل الأهلي كالتالي:

محمد الشناوي في حراسة المرمى، ومحمد هاني، وأحمد رمضان بيكهام ومصطفى العش وأحمد نبيل كوكا في الدفاع، وإليو ديانج ومروان عطية ومحمد علي بن رمضان في الوسط، ومحمود تريزيجيه وأحمد سيد زيزو ومحمد شريف في الهجوم.

فيما تواجد على دكة بدلاء الأهلي كل من: مصطفى شوبير وياسين مرعي وأحمد رضا ونيتس جراديشار وحسين الشحات وأشرف بن شرقي ومحمد مجدي أفشة وإمام عاشور وطاهر محمد طاهر.

بينما جاء تشكيل إنبي كالتالي:
عبد الرحمن سمير في حراسة المرمى، أحمد صبيحة، أحمد كالوشا، مروان داوود، محمد سمير سعد في الدفاع، أحمد العجوز، مودى ناصر، محمد حمدى، أحمد كفتة، محمد حتحوت في الوسط أحمد زكى في الهجوم.

وتواجد على دكة بدلاء إنبي كل من: رضا السيد، رفيق كبو، هشام عاد، يوسق أوباما، على محمود، أحمد إسماعيل، سيد سعيد، محمد سمير عبد الوهاب، زياد كمال.