محمد إيهاب يكشف تفاصيل تواجده فى سويسرا بشأن أزمة إيجابية عينة الأولمبياد

محمد إيهاب

كتبت ندى مجاهد

الثلاثاء، 16 سبتمبر 2025 01:20 م

كشف محمد إيهاب ، البطل الأولمبى فى رفع الأثقال ، التفاصيل الكاملة لتواجده فى سويسرا من أجل إعادة تحليل العينة B المغلقة الخاصة بأولمبياد ريو دى جانيرو، بعد إخطاره مؤخراً بإيجابية العينة A من قبل اللجنة الأولمبية الدولية.

وجاء سرد إيهاب للقصة الكاملة عبر صفحته الشخصية على موقع التواصل الاجتماعى "فيس بوك" كالتالى:

ليه كنا رايحين سويسرا ؟!!

1- نفتح العينه B ومتابعة خطواتها الفنية خطوة بخطوة وحسب المعايير الدولية.

2- مراجعة كل خطوة قانونياً وتسجيل كل الملاحظات والشوائب والشكوك، ويتم عمل محاضر موثقة للتأمين في الخطوات القادمة من جلسات الدفاع أمام لجنه الاستماع أو المحكمة الرياضية الدولية.

عملية التحليل خلصت، طيب إيه اللي حصل فيها ؟!!

1- تم مراجعه العينة A واللي قالوا فيها انها سلبيه في الريو وايجابيه في سويسرا وعلي الواقع طلعت فاضيه والغطا مش مكبوس والارقام مختلفه والورق بتاع تخزينها قالوا مش موجوده لطول مده التخزين (تسع سنوات) ورجعوا قالوا استنوا علينا 15 يوما، و كل ده بمحاضر رسمية !! .

2- بعض المعلومات في العينه B متسجله و بامضتي وعلي الورق غير مطابقه للواقع وده تم رصدها وتوثيقها بالصور الفوتوغرافيه والمحاضر !! .

وايه تاني ؟؟ !

كنا رايحين و متوقعين نفس السيناريو ونفس النتيجه بنسبه 90% : والبيانات متشاله في الأدراج، و ده بعد رفضهم الرسمي نقل العينه من معمل لوزان بسويسرا الي معمل كولون بالمانيا، ويقولك مفيش داعي تتنقل مفيش اي حاجه تلزمنا ننقلها لمعمل آخر رغم اني طلبت نقلها علي نفقتي الخاصه !! .

طيب واللي جاي ؟!!

-المرة دي الوضع مش بالبساطه … المره دي ماسكين ورق يثبت فيه حوارات تخالف المعايير الدولية هم انفسهم كاتبينها بخط أديهم وماضيين عليها، هيفصل فيها لجنه الاستماع والمحكمه قبل أتخاذ اي عقوبه رسميه .

فين بداية القصه ؟ !!!

- من ساعة أحداث براءه الدكتور خالد قرني في المحكمه الرياضيه الدوليه و هد الصورة اللي عاوزين يصدروها للعالم ان الاتحاد المصري راعي المنشطات ، و بعد ما وقفوا الاتحاد سنتين وحرمونا من أوليمبياد طوكيو ظلماً رغم تأهيلنا رسمياً و غرمونا ملايين للرجوع للنشاط الدولي وكل ده علي أساس فاشوش .، وطالما مش لاقيين حاجه يألوفوها فيقولوا هرمون يظهر في نصف ونصف آخر لأ ، هرمون يختفي وجوده خلال اربع ايام فقط قبل الاوليمبياد .، هرمون بيتكشف من الثمانينات اكتشفوه بالعين المجرده بعد 9 سنوات ،، من الآخر فيلم هندي .

هل ده آخر المطاف ؟!!!

_اللي حصل معايا في المعمل مؤخراً مش مجرد "عملية تحليل عابرة"… ده ناقوس خطر بيقول: إن الدنيا هتبقي سداح مداح .، ويأما نركب نفس المركب ونجدّف سوا… يا المركب دي هتغرق بينا كلنا و أي بطل مهدد أنه يتاخد حقه أمام عيون العالم ومحدش هيدافع عنه حتى ولو ورقه كله سليم .

= الحلول مش مستحيله ؟!!

تضامن حقيقي من وزاره الشباب والرياضه واللجنه الاوليمبيه المصريه عشان نقدر نقف امام المحكمه الرياضيه الدوليه ومعانا الاحقيه في الحفاظ عن الميداليه الاوليمبيه .

نبني آليه وطريق واضح لحمايه حقوق الأبطال الأوليمبيين من أي ضيوف تقال علينا يعملوا حفله ويقلبوا علينا الطربيزه في اي وقت يختاروه وقيس الكلام ده أن اي بطل اوليمبي هيحتفظوا بعينته لمده عشر سنوات قدام .

_الطلعه اللي جايه أهم من كل اللي فات ،، مش هيكون اجتماع روتيني … دي الفرصة الأخيرة: يا نرجّع الميداليه ونبقى قوة قانونيه يُحسب لها حساب، قبل اصدار أي قرار في حق سحب أي الميداليه بالباطل .، يا نستنى اليوم اللي نلاقي فيه كل بطل ملهم وقدوه عندنا بقا ساحة جدال مفتوحة ومهدد يشوهوه نفسياً ويلوثوا تاريخه بجرة قلم و بالمزاج .،

= نستعين بالله وبكل ما أوتينا من قوه سندافع عن تاريخنا ..، و بالاثباتات سنثبت علي موقفنا بعون الله للحفاظ علي الميداليه الاوليمبيه الموجوده في المتحف الاوليمبي و سنقف امام اي أحد بالاوراق وبالقانون لرفع الشبهه و ظهور نزاهتنا .

- عائدين اليوم إلي بلدي وكلنا يقين في الله سينتصر لنا في النهاية .، فاللهم اهدنا خير السبيل . ولا تتركنا فريسه سهله للقوم الظالمين .

محمد إيهاب 1

محمد إيهاب 2

جاء ذلك بسبب الاتهام الموجه بتعاطي الهرمون الذي ظهر بعد ثماني سنوات من نفس العينة A و بعد إعادة العينة ظهرت إيجابيتها مرة أخرى ، حيث يستعد اللاعب إلى اللجوء للمحكمة الدولية بعد إمتثاله للجنة الإستماع فى الوكالة الدولية للمنشطات خلال الأيام المقبلة.

وكان محمد إيهاب كشف فى تصريح لـ اليوم السابع ، أنه بعد فتح العينة المعمل أكد سلبيتها فى ريو دى جانيرو و إيجابيتها فى سويسرا مرة أخرى .

وتواجد إيهاب فى سويسرا خلال اليومين الماضيين لاتخاذ الإجراءات القانونية، تم عمل 3 محاضر رسمية تفيد بتزوير العينة وعدم صلاحيتها ونقل بياناتها من جهاز لآخر".