هند عبد الله: نجاح حكاية "هند" فى إن الناس تصدقها وإن الشخصيات حقيقية

كشفت الكاتبة هند عبد الله عن تفاصيل كتابة حكاية "هند" التي عرضت ضمن حكايات مسلسل "ما تراه ليس كما يبدو"، وهل مبنية على أحداث واقعية أم اعتمدت على خيال درامي، قائلة: "أكيد فيه خيال درامي عشان نقدر نوصلها للجمهور واستفزهم زي ما حصل أنا مش بكتب السيرة الذاتية ليا كهند عبد الله، في النهاية أنا مؤلفة وأي مؤلف بيقرر يكتب حكاية سواء مستوحاة من حكاية حقيقية أو حتى سيرة ذاتية بيبقى مضطر يحولها لمعالجة درامية فيها تصاعد وحبكة".

وتابعت هند عبد الله: "نقدر نقول زودت بعض البهارات على الحكاية الأصلية ويمكن ده اللى بيخلى بعض الشخصيات ترفض عمل مسلسل عن حياتهم، ففي مسلسل هند أنا افترضت فرضيات وبنيت عليها الدراما، يعني مثلا ماذا لو مكنش أهلي دعموني كان هيحصل ايه، وهكذا".

وأضافت: "الحقيقة أنا شايفة إن قصة هند مش مختلفة عن أى قصة اتعرضت قبلها في المسلسل وفي النهاية كل القصص بتتكلم عن العلاقات الإنسانية والمشاعر، وأصحاب القصص التانية اختاروا يسردوها بشكل فيه فانتازيا شوية، وهند حسيت ان نجاحها في ان الناس تصدقها وتحس ان فيه شخصيات من المسلسل عايشين وسطنا وحوالينا".

وعن تعاونها مع المخرج خالد سعيد في تحويل النص من ورق لصورة على الشاشة، قالت هند عبد الله: "خالد سعيد أضاف أهم حاجة للمسلسل وهي الإحساس، فهو مخرج بيقدر يحس بالورق مش بيقراه من بره بس وبيعيش الحالة ويزعل ويتعصب معاها وده اللي خلاه يقدر يوصل المشاعر دي للممثلين ولكل الفريق".

وعن ردود الأفعال قالت هند عبد الله: "مبسوطة جداً من ردود الفعل على قصة هند الحمدلله وحاسة ان كل الناس فهموا رسالة المسلسل ودي اهم حاجة بالنسبالي كمؤلفة".